Simtute tengteng na vek un i Toupa Jesu Khrist min manpha in chibai kon buk hi. GBC Link tu Spring semester 2025 issue suahkhethei ding a i Toupa’n honpi ta ahih man in Toupa min i phat hi.

I Gam buai vengvung kawmkal ah Toupa hon ompih na tang in Academic Year 2024-2025 bei kuan ah i dingta a, hiai kumsung i et kik chiang in Toupa hoihna khatkhat a sim ding chileng sim senglouh in i dong a, tua ahihman in hiai tan a hon makaih tawntung Jehovah min manpha i phat hi.

Tu kum sung in Sintu naupangte hi in, sinsaktute leh office a nna tuamtuam semte hita leh Toupa makaihna toh maban kisawntou theizel hi. Tulel a abubit a hong kai naupang i neih bangzah hiam te’n a sinna uh hon zousiang theita ding un kilang a, huai kia lel leng hilou in a gal a sin tamkhop in leng zouthei ding dinmun in dingta uhi. Amaute ziak a Pathian kiang a kipahthu gen kawm in a maban ua Pathian mi zat ahong hih ua, Pathian deih bang nna sem khate leh, a lungtunna bang a Pathian nna sem khate a hong hih theih nang un i thum nate uah delhzui zom tou zel lai ding in i ki ngen hi.

GBC Campus development nasepna leng pai zom tou zel in naupangte ann nekna mun ding (Mess Hall) ki bawl lel hi. Toupa’n pha hon saksak leh March khasung ngei a zohsiang di’a lam et ahi. Sinsaktute quarters ding hun bangtan hiam a lampat a om pen leng zohsiang phial hita hi. College vai ah sepding leh bawl ding om khempeuh a hon makaih gige BOG-te tung ah leng kipahthu i gen hi. Hiaite banah GBC khantouhna ding a pan ana la gige tualsung saptuamte, naupang chawmna a khateng a pangte, Patron leh Life memberte leh lam chi tuamtuam a thilpiak hon pe tengteng leh thumna a honna phawk gige thum mite tung ah kipahthu i gen hi. Pathian a di’a zattak leh muanhuai GBC- te a kihih zel theihna ding in simtute’n na thumna uah hon na phawk gige ding in ka hon ngen hi.

Toupa’n GBC Link simtute tengteng hon vualzawl hen aw.